作词 : Unknown
作曲 : Unknown
G：讲个秘密你哋知啊
我好钟意睇人哋嘅电话有咩APPS咖
因为每个唔同性格嘅人
都会下载唔同嘅APPS
有人个电话 成页都係跑步健身APPS
有人呢 就有好多好多唔同相机同执相APPS
有人呢 就
哇 好靓喔 呢个APPS果D画 咁靓嘅
用佢嚟画水彩画好似真嘅一样喔
O：喂 你唔好睇佢电话啦
G：AU HI 哇 你个样好攰喔
O：唉 係啊 做咗就嚟二十个钟
真係电脑都就嚟顶唔顺了
啊 唔好意思 你嚟咗咁耐
宜家先得闲理你
G：唔紧要
我睇你主人喺度画嘢 真係好享受咁啵
我第一次睇人喺电脑画画咋
你主人 真係好多Job喔 做到咁夜嘅
O：冇钱咖 应该係话 未有钱
佢啱啱先毕业 好多时D Job 倾倾下
人哋就话唔驶了 冇Budget啊嘛
所以佢咪想参加绘本比赛
一嚟有奖金 二嚟又多人认识喔
所以你咪成日见佢画啊画画啊画咯
G：我都好钟意睇绘本咖
D人成日话绘本係俾小朋友睇
但我觉得都唔係啊
好多绘本嘅画都好靓 同埋D故事都好有意思
好似台湾嘅几米嘅绘本
我成日都会睇到又喊又笑咖
O：咦 你係识D嘢个喔
我主人同佢妹妹两个人 由细到大都好钟意绘本
因为佢哋话 买翻嚟嘅书之中
得绘本係有时间可以由头到尾睇晒咖
宜家D人真係忙啊 睇本书都要快喔
G：其实重会睇书嘅人都好少啦
我钟意睇绘本 係因为唔同嘅作者都有唔同嘅风格
有人用简简单单的笔触 就勾画出令人有共鸣嘅感觉
果一下 透过图画同文字 联结到作者嘅心意
真係好奇妙嘅
O：你讲嘢同主人都几似嘅喔
佢就係想用绘本去鼓励同陪伴其他人
当然唔少得 就係佢最锡嘅妹妹啦
佢係好勤力咖 用嚟参赛本书一早就画好咗
但因为未到deadline 佢就成日翻睇又翻睇
之后再改过晒 不停试下唔同构图 唔同配色
试下唔同风格啊嘛
有时睇住佢越做越兴奋 我都怀疑佢係咪上咗瘾
G：哇 你讲到咁 我都好想睇下佢嘅画喔
O：等我睇睇先
嗱 根据平时嘅数据 佢应该重有三分钟先饮完咖啡嘅
好啦 我就俾你第一张啦
G：哈 好得意啊哩个女仔
係你主人自画像啊？
O：嚟个係佢画佢妹妹瘦咗嘅样
佢以前会成日同佢妹妹去跑步嘅 因为要陪佢减肥
但呢半年晚晚都画到好夜啊
终于佢都察觉到佢妹妹唔开心
就画咗张画送俾佢咯
G：佢头先画一个背景同一只兔仔人物都搞咗咁耐
呢一幅画嘅笔触咁仔细 哇 实用咗好多时间啦
咁但係 点解佢唔直接花时间陪佢妹妹啊？
O：我细细声同你讲啊
因为画画氹妹妹可以顺便储多张作品啊嘛
妹妹都明白 主人目前有目标要追
都冇再唔开心了 但就约定咗主人
交咗稿之后一定要即刻陪佢去跑步
G：我谂你主人交咗稿之后应该会即刻大觉训了呱
好了 佢画画咁靓 咁我下次演唱会个poster就搵佢画啦
O：吓 你唱歌嘅咩 乜你唔係……
啊 主人翻嚟啦 唔讲啦 删翻张图先
G：OK 咁我唔阻你啦
啊 等我拎定你主人对跑步鞋出嚟
提佢要做运动先
诶 边一对係啊？
O：黄色果对啊 你记得要再嚟搵我啊
G：我哋有好多时 会花好多时间 好多精神去工作
都係为咗更好嘅将来 令身边人开心
但你又有冇谂过 其实你要嘅美好生活 同最爱嘅人共度一段开心时光
其实 并唔係你想象中咁遥远呢？
只要你放低手上面嘅工作 抽少少时间
其实就可以即刻做到
记住啊 工作并唔係你人生嘅全部
生活中 重有好多值得你留意嘅人同事
一直 等紧你咖